SARA (Search And Rescue Application)

SARA-applikasjonen er eit krisehandteringssystem utvikla av Christian Michelsen Research (CMR). Etter ein fusjon i instituttsektoren i 2018, der CMR vart ein del av NORCE, er applikasjonen vedlikehalden og vidareutvikla av NORCE.

SARA har vore i bruk i Hovedredningssentralane (HRS) på Sola og i Bodø som støtte- og loggesystem sidan januar 2000. Når turgåarar er sakna eller tekne av ras, når båtar brenn eller går på grunn, når sjuke cruisepassasjerar må fraktast til sjukehus eller det skjer ei ATV-ulykke, så er det HRS som koordinerer søk- og redningsaksjonane. HRS registrerer over 8000 slike nødhendingar per år i SARA.

Offentlege, private og frivillige redningsressursar som t.d. politi, ambulanse, redningshelikopter og Røde Kors, kan via SARA søkast opp i Felles Ressursregister.

På SARA-kartet blir posisjonane for hendingane og for tilgjengelege og involverte ressursar markerte, saman med t.d. definert søkeområde. SARA hentar inn data frå fleire tredjepartar. Vêrdata blir henta frå Meteorologisk Institutt og viste på kartet. AIS-data (båt-posisjonar) blir kontinuerleg lasta ned frå Kystverket og viste på kartet ved hjelp av applikasjonen TrackServer, som også er utvikla av CMR/NORCE. Søk i Sentralt stedsnavnregister, hjå Statens kartverk, blir brukt for å finne adresseinformasjon.

Ein tilpassa versjon av SARA har vore i bruk i Kystradiostasjonane (Telenor Kystradio) sidan 2004. Radio Medico (Norsk senter for maritim medisin og dykkemedisin) har sidan 2014 også brukt ein tilpassa versjon av SARA.

SARA er skrive i Java og byggjer på standardar som HTTPS, LDAP, JMS, JDBC. All informasjon blir distribuert til server(e) og andre brukarar slik at alle heile tida har same informasjon tilgjengeleg, enten dei jobbar med den same eller kvar sine hendingar.