Eg er fysikar med spesialisering innan akustikk. Eg har jobba både eksperimentelt og teoretisk med ulike ultralydteknologiar, og har erfaring med numerisk modellering av piezoelektriske ultralydtransdusarar og akustiske målesystem. Dette inkluderer strømmingsmåling i røyr, materialkarakterisering av faste stoff og deteksjon av avsetningar/innsnevringar i røyrleidningar.
For tida fullfører eg ein doktorgrad i akustikk ved Universitetet i Bergen, ved sida av arbeidet i NORCE. Doktorgraden er knytt til lydfartsmålingar i naturgass for å estimere energiinnhald. Dette inneber mellom anna utstrakt bruk av endeleg-element-modellering i COMSOL Multiphysics® for å bestemme naudsynte korreksjonsfaktorar meir nøyaktig og dermed redusere usikkerheita til lydfartsmålingane.
Eg har også erfaring med (i) usikkerheitsberekningar av målestasjonar, målesystem og CO2-utslepp, (ii) bruk av lydfart, trykk og temperatur til å estimere gasskvalitet og (iii) allokering av olje og gass.
